Нотарската комора изрази сочувство до семејствата на загинатите во пожарот во Кочани и објави дека ќе донира еден милион денари за поддршка на семејствата на настраданите.
– Во овие тешки моменти за нашиот народ, треба да бидеме хумани и општествено одговорни. Секој од нас, како индивидуа и како заедница, треба да помогне на начин што е во рамките на неговите можности, и да ја поддржи работата на надлежните институции во расветлувањето на трагичниот настан, се наведува во соопштението од Нотарската комора.
Како општествено одговорна институција, Нотарската комора ги поддржува напорите на Владата во борбата против корупцијата и за нејзино искоренување.
– Сите ние сме должни да го оддадеме почитта на оние што ги загубивме, како и на идните генерации. Во овие болни времиња, делата зборуваат погласно од зборовите. Затоа, да останеме разумни, сплотени и солидарни, изјавуваат од Нотарската комора.
