„Жалам што досега се толерирале вакви практики. Жалам што луѓето во Министерството за економија, иако добивале документи под полна материјална, морална и кривична одговорност, не ги проверувале екс оффицио, како што предвидува законот. Жалам што овие лиценци се издавале за 15 минути и за одредена сума, без да се исполнуваат законските услови. Ако можев да го вратам времето, би било сѐ поинаку, но за жал, тоа не е можно“, изјави премиерот Христијан Мицкоски, одговарајќи на новинарски прашања за безбедноста на ноќните клубови и кабареата.
„Сега тековно се спроведува акција од Државниот пазарен инспекторат ширум државата. Според Законот за угостителство, се лиценцираат кабареа, како и отворени и затворени дискотеки. Меѓутоа, бројката на клубови со легални документи е далеку помала од онаа која е незаконски активна. Според измените на Законот од 2007 година, правното лице што бара лиценца потпишува изјава под материјална, морална и кривична одговорност дека ги исполнува сите услови. Но, проблемот е што овие документи не биле проверувани екс оффицио.
Овој објект со повеќе од 500 квадратни метри не може да биде лиценциран како кабаре по ниту една основа. Дополнително, законски, за дискотеките треба да се плати поголем надоместок отколку за кабаре, но тоа не значи дека може да се одобри лиценца за објект кој не ги исполнува основните технички услови.
Нема да дозволиме ниту еден објект кој не ги исполнува законските стандарди да продолжи со работа. Ние, како Влада, ќе спроведеме сериозна акција за затворање на сите клубови кои не ги исполнуваат условите и ќе бидат соодветно санкционирани“, истакна Мицкоски, додавајќи дека новите проверки се веќе во тек.
