Одговарајќи на новинарски прашања, премиерот Христијан Мицкоски изрази жалење што новиот министер за надворешни работи на Бугарија, како што рече, заборава дека добрососедските политики се темелна вредност на европските вредности, без разлика дали некој е или не е дел од Европската Унија.
„Ако промената на Уставот не е директно мешање во внатрешните работи на една суверена и независна држава, тогаш навистина не знам што е“, изјави премиерот, коментирајќи ја реакцијата на Министерството за надворешни работи на Бугарија, кое оцени дека е зачудувачки што преземените обврски од страна на земјава се доживеани како мешање во внатрешните работи од страна на македонскиот премиер.
Мицкоски додаде дека новиот министер за надворешни работи на Бугарија заборава дека добрососедските политики се темелна вредност на европските вредности, без разлика на тоа дали некој е дел од Европската Унија.
„Би се повикал и на меѓународното право, на Конвенцијата за заштита на правата на заедниците и тука не можам, а да не го коментирам правото на македонската заедница во Бугарија, која се темели на 14 пресуди од Судот за човекови права, да го реализира своето право. Тука треба ние сите како граѓани да ја поддржиме македонската заедница во Бугарија, која, за жал, во 21-от век, во земја членка на ЕУ, не може тоа право да го оствари. Тоа нема никаква врска со внатрешните работи, туку исклучиво со резолуцијата за заштита на човековите права, чиј ратификатор е и нашиот источен сосед, како и нашиот партнер во НАТО“, изјави Мицкоски.
За изјавата на бугарското МНР, Мицкоски истакна дека тој демонстрира недоволно разбирање на одлуките на Европскиот суд.
Прашан за коментар на изјавата на евроамбасадорот Михалис Рокас, кој рече дека постои интензивна дипломатска активност за решавање на спорот со Бугарија и дека се надева дека за два-три месеца ќе може да се откочи процесот на патот кон ЕУ, премиерот истакна дека можното деблокирање може да се случи и задутре, но тоа не зависи од нас, туку од некои други фактори.
„Ние не сме како некои поранешни политичари кои тоа го гледаат како егзибиционизам, кариеризам и нешто што е спротивно на интересите и заштитата на националните интереси на граѓаните. Така што, македонските граѓани и државата во целина очекуваат вистински пат кон ЕУ, нешто што го очекуваат веќе 20 години, и кое ќе се темели на Копенхагенските критериуми и систем базиран на заслуги, а не на билатерализација и решавање на билатерални спорови“, изјави премиерот Мицкоски.
