ССМ не се откажува од барањето за повисок минималец, 6.000 денари повеќе од она што го предвидува законот со што би достигнал 30.000 денари. Подаваат рака за преговори и велат дека Владата во нив не треба да гледа низ призмата на политиката. Доколку нема договор не ја исклучуваат можноста да излезат на протести.
„ССМ очекуваше Владата да има разбирање, меѓутоа тоа што го добивме се ниски напади од ВМРО-ДПМНЕ, што е недопустливо во демократско општество, додаде Трендафилов кој рече дека власта во моментов бара синдикален партнер „по мерка“ и сака да го исклучи ССМ од Економско-социјалниот совет“, Слободан Трендафилов – претседател на ССМ
Од владејачката партија, пак, сметаат дека било очигледно оти Сојузот на синдикати е во координација со СДСМ. Велат дека СДСМ првин излегува со соопштение, потоа ССМ само ги повторува нивните барања а СДСМ ги прифаќа и најавува дека ќе ги преточи во предлог – закон.
Слободан Трендафилов е незаконски претседател на ССМ, кој ја узурпирал функцијата со помош на СДСМ… Ова не е независен синдикат, туку партиски инструмент на СДСМ. Се користи за креирање забуна во јавноста и за блокирање на реформските процеси, велат од ВМРО- ДПМНЕ
Методологијата со која минималецот треба да порасне за само 1.800 денари ја донесе СДСМ кога беше на власт, а сега од опозиција вели дека најмалата плата требала да порасне за 7.800 денари.
Нивните проекти за кои мислат дека ќе донесат некаков ефект, немаат никаков резултат, туку и одбиваат покачување на 500 евра плата. Одбиваат да соработуваат, да имаа социјален дијалог и да ги покачат платите на работниците, рече Кузеска од СДСМ.
Владата порача дека ќе прифати се што ќе договорат работниците и синдикалците, но е децидна дека во буџетот нема пари за субвенционирање на придонесите како што предлагаат и ССМ и СДСМ.
За да продолжат преговорите на ЕСС, мора да се формира комисијата која ќе ја утврди репрезентативноста. Според најавите од премиерот тоа треба да се случи на утрешната владина седница.
Според законот, минималната плата треба да се усогласи до средината на месецов, а да почне да се исплаќа од април.
