Економијата се консолидира побрзо од очекувањата. Премиерот Мицкоски вели дека сите статистички показатели покажуваат дека руинираното стопанството закрепнува и веќе е на состојба нула. Позитивни сигнали дава рекордното ниво на странски директни инвестиции по глава на жител и високиот раст во последните три месеци од минатата година. Мицкоски очекува зголемување на економијата и од 4 до 4 и пол проценти во првиот квартал од 2025 година.
-Индикаторите кои се јавуваат во првата половина година од мандатот на Владата укажуваат дека сме дојдени до состојба „0“, имаме 1,25 милијарди евра странски инвестиции за претходната година од кои рекордни 400 милиони за четвртиот квартал со што повторно сме најдобра земја во регионот по глава на жител и во првите три во Европа, а растот на БДП за 2024 година е 2,8 иако некои ни предвидуваа дена нема да биде ниту 1 отсто, рече Мицкоски во одговор на новинарско прашање при денешната посета на Свети Николе.
Нашата стратегија по доаѓањето на власт, додаде, беше поделена во три чекори од кои првиот беше да се спречи слободното паѓање, бидејќи системот и институциите беа во распад, владината сметка беше минус 200 милиони евра, во што успеавме.
-Втората фаза е од таа точка да стигнеме полека до состојба „0“ и практично сме на крајот од овој втор чекор. Индикаторите што ги истакна Државниот завод за статистика токму тоа го велат дека конечно дојдовме до состојба „0“ иако некои предвидуваа дека консолидирањето ќе трае можеби една или 1,5 години, рече Мицкоски.
