Новата влада на Австрија денеска ќе положи заклетва пред претседателот Александар ван дер Белен.
Владата е составена од три партии – од Австриската народна партија (ОВП) и Социјалдемократската партија на Австрија (СПО) и Неос.
Лидерот на ОВП, Кристијан Штокер ќе биде канцелар, а претседателот на СПО, Андреас Баблер ќе вицеканцелар. Додека лидерката на Неос, Беате Мајнл-Рајзингер ќе биде министерка за надворешни работи,
Церемонијата на положување на заклетва означува крај на петмесечните обиди за составување на нова влада на Австрија. Десничарската Австриска партија на слободата (ФПО) на парламентарните избори минатата година освои најголем број гласови, но сега ќе биде опозиција.
Трипартитната владејачка коалиција е формирана откако Неос одлучи да биде дел од новата влада заедно со ОВП и СПО.
Новата австриска влада планира построги закони за миграција, поповолна даночна политика за просечните граѓани и најави континуитет во надворешната политика и политиката на ЕУ, што вклучува континуирана поддршка за Украина.
Трите партии преговараа за коалиција по изборите во септември, но преговорите пропаднаа во февруари поради несогласувањата помеѓу СПО и Неос. Потоа мандатот за формирање влада го доби ФПО. Но преговорите помеѓу ФПО и ОВП пропаднаа поради несогласувања околу поделбата на надлежностите.
