Членовите на Судскиот совет не чувстуваат морална и професионална одговорност, ниту пак ќе да си поднесат оставка дури и ако Собранието им изгласа недоверба. Ова може да се извече како заклучок ако се прочитаат одговорите на Весна Дамева, Павлина Црвенковска, Тања Чачарова Илиевска, Селим Адеми и Миљазим Мустафа кои писмено му ги доставиле на собранискиот спикер Африм Гаши. Причините со кои се бара нивна интерпелација, според нив, биле паушални. Бараат да има индивидуална, а не колективна одговорност за членовите. Потоа, интерпелацијата ја оценија како политичко мешање во работата на судиите иако овие челнови не се судии туку се избрани во собранието како истакнати правници. Во писмената реакција до Гаши членот на Сидски, Селим Адеми тврди дека немало доволно издржани аргументи за интерпелацијата.
- „Во однос на создржината и наводи во истата (интерпелацијата), иако постои обид за некаква конкретизација на наводно пропусти во работењето на членовите, изнесените наводи се многу паушални и се должат на очигледно не познавање на состојбите во судството“ пишува Селим Адеми – Член на Судски Совет.
Експретседателката Павлина Црвенковска не се согласува дека интерпелацијата може да се примени врз членовите на Судски, иако се избрани во Собранието. Нејзината наследничка Весна Дамева, повторува дека секој треба да си сноси одговорост за она што го сторил.
- „..Правната доктрина не познава колективна одговорност, туку одговорноста секогаш мора и треба да биде индивидуална. Секој е одговорен за она што го сторил и неговата одговорност мора да биде утврдена во постапка и на начин согласно Уставот, законите и меѓународните договори… а врз основа на докази изведени во текот на постапката, почитувајќи го принципот на еднаквост на оружјата“ стои во одговорот на Весна Дамева – Член на Судски Совет.
Неоснована е интерпелацијата поднесена за мене тври и Миљазим Мустафа, додека пак Тања Чачарова Илиевска е децидна дека не чуствува ниту професионална ниту морална одговорност. Владејачкото мнозинство на 7-ми февруари поднесе интерпелација за членовите кои се избрани во Собранието, во кои директно гледаат вина за нарушената доверба во македонското правосудство. На ист став е и претседателката Сиљановска Давкова за која наместо членовите да ја бранат правдата се претвориле во судски скандал мајстори. Интерпелацијата според најавите на дневен ред во Собранието треба да се најде идната недела.
