Прилепскиот храм на културата, НУЦК „Марко Цепенков“, го заокружи своето четири и пол децениско успешно постоење. За првпат ставена во функција како Дом на културата на 14 ноември во далечната 1979 година, оваа исклучително важна културна институција, гордо приближувајќи се кон златниот јубилеј, веќе 45 години е јадрото на целокупното културно живеење во градот под Марковите Кули каде се одржуваат бројни културни настани. Во таа чест, и месецов, роденденски се реализираа голем број изложби, концерти и промоции.
„На почетокот ги поттикнувал аматерските самодејности: фолклор, сликарски школи, драмски и литературни, фото-клубови. Во 90-тите години прераснува во Центар за култура со професионална издавачка, ликовно-галериска и музичко-сценска дејност, а од 2004 година е Национална установа во чии рамки влегува и НТ „Војдан Чернодрински“. Годишнината ја одбележавме со изложба на дела од Ликовната колонија „Дрен“ и со Концерт на Фиа Трио, а наредниот период следуваат уште концерти, изложби, промоции, филмски проекции“, – ни изјави Марија Попова-Јованоска, в.д. директор на НУЦК „Марко Цепенков“, Прилеп.
Роденденските чествувања не завршуваат овде, туку истите ќе продолжат и во наредниот период со уште културни настани, но и со премиерата на театарската претстава „Господинот“ на матичниот театар „Војдан Чернодрински“, а пригодно ќе бидат одбележани и 70 години од формирањето на Списанието „Стремеж“. Интеницијата на менаџарскиот тим е во наредниот период Центарот за култура уште повеќе да се отвора кон граѓаните, а особено кон креаторите и почитувачите на културните збиднувања од различни области, бидејќи како што вели директорката, оваа установа била, е, а и ќе биде репрезент на високо-професионални театарски, литературни и ликовни дела која дава и значајна поддршка на културниот аматеризам.
Каролина Дурло
