Премиерот на Србија, Милош Вучевиќ, денеска изјави дека целосно го поддржува враќањето на задолжителниот воен рок и дека Владата на Србија е подготвена, доколку се постигне политички и општествен договор, брзо да предложи закон за ова и да го поднесе до Собранието на усвојување.
„Владата е подготвена многу брзо да го поднесе предлогот до Народното собрание, а кога ќе бидат исполнети логистичките и административните услови, да започне со спроведувањето во 2025 година. Јас, како премиер, и целата влада ја поддржуваме иницијативата на претседателот Вучиќ за можноста за укинување на суспензијата на воениот рок,“ изјави Вучевиќ за РТС.
Тој потсети дека во април беше изготвен елаборат со предлози за враќање на задолжителниот воен рок, при што претседателот предложи дека овој рок не би требало да трае подолго од 75 дена – од кои 60 дена ќе бидат посветени на обука, а дополнителни 15 дена на вежби. Според предложената структура, определени профили на образование ќе бидат посебно категоризирани, на пример, оние со завршено машинско училиште или факултет ќе бидат интегрирани во воено-техничките единици, додека останатите ќе поминат редовна обука.
Вучевиќ истакна дека враќањето на задолжителниот воен рок ќе биде корисно и за младите и за целата земја.
„Ова не е подготовка за војни и конфликти, туку грижа за земјата. Нашата земја не го укинува професионалниот состав на Вооружените сили на Србија, кој е клучен за извршување на најсложените задачи“, рече Вучевиќ.
