Пожарите не стивнуваат – активни се десет од вкупо 45. Гори кај Кичево, Македонски Брод, Пехчево, Новаци, Пласница, Неготино и Ресен а најалармантно е на планината Буковик во близина на Пехчево. Пламените јазици ја голтаат шумата, но и единственото возило на Доброволното противпожарно друштво. Марјан Митриновски секојдневно се бори со огнената стихија, бидејќи, како што вели, планината е негов втор дом. Како туристички водич тој најдобро ја познава.
Осум денови беснее и пожарот на Галичица. Откако ќе се стави под контрола огнот повторно ветрот го враќа на македонска страна. Пожарот се прошири кон преспанскиот дел кон Стење и Магаро. Постои опасност да навлезе во шумите. Ренџерите бараат помош од воздухоплови.
Поради неповолниот ветер, и негаснењето од албанска страна има големи шанси пламените јазици да се прошират.
Во јули биле регистрирани 765 пожари од пошироки размери, соопшти Центарот за управување со кризи. Најголем дел од пожарите зафатиле висока сува трева, стрништа, нискостеблеста, деградирана шума и депонии. Вкупно 608 пожари се регистрирани на ваков терен, а 157 биле шумски пожари, кои ја прават најголемата штета. Од Национални шуми велат дека се уништени илјадници хектари шума, за која ќе биде потребно најмалку 50 години за да се обноват.
Ања Лукарова
