МАНУ е и ќе биде единствена научна институција која што ги собира најголемите научници од сите различни етнички заедници во државата. Нова, парарелна Академија на науките и уметностите нема да има, порача премиерот Христијан Мицкоски, повторувајќи го цврстиот став дека нема да се реализира идејата за „Албанска академија на науките и уметностите“.
Вели јасен е ставот на Владата, дека нова научна институција нема да има, а ако некој сака од ова да прави тема во јавноста- Мицкоски вели, не можел да го спречи.
-Единствена институција која што ја собира научната мисла и научниците од различни етнички и научниците од различни етнички заедници во Македонија е МАНУ и тука завршува и почнува се. Се останато е фолклор и можеби некаков политички маневар. Јас мислам дека треба да продолжиме со институции каде што се генерира знаење, каде што науката е пред се, не постојат етнички научни институции, нема еден таков пример во светот, изјави Мицкоски.
Од коалицијата „Вреди“ остануваат на ставот дека е потребна нова научна академија, бидејќи според нив МАНУ била затворена за албанските научници. Сепак доколку се погледне листата на академици, јасно се гледа дека таа не е затворена за ниту една етничка заедница. Во моментов во МАНУ има четири членови од албанската етничка заедница, Абдулменаф Беџети, Изет Зеќири, Алајдин Абази и Али Алиу.
-57 години како што кажавме мислиме дека е многу доволно време, за да се докаже МАНУ дека е отворена институција за Албанците. Ако 57 години биле доволно за само тројца или четворица да бидат вработени во академијата, а сметам дека низ годините сме имале голем број на интелектуалци, академици, тогаш не верувам дека ова е инклузивна и интегрирана институција, изјави портпаролот на „Вреди“ Фари Хисени.
Против оваа идеја на „Вреди“ се крена целата научна фела. Актуелни академици и експерти коментираат дека е неприфатлив предлогот паралелно на МАНУ да се формира друга таква институција. Според нив, и во актуелниот состав има Албанци, но изборот во инситутцијата се темели на високи и строги критериуми, а не на припадноста на на етничка заедница.
Матеја Петровски
