Прво нов Управен одбор на Фондот за здравство – па проширување на позитивната листа на лекови. Според министерот за здравство Таравари, пари има за да се одобрат нови лекови на рецепт а не се спорни ниту деветте медикаменти кои е најавено дека ќе се најдат на новата листа.
„Има и пари, нема никаков проблем, само чекаме да се избере новиот Управен одбор. Значи, Управниот одбор се уште не е комплетиран. Инаку, од наша страна е испратено пред две недели со согласност од Фондот. Штом ќе има прва седница Управниот одбор на Фондот позитивната листа ќе ја промовираме заедно со директорот на Фондот за здравство“, изјави министерот Таравари.
Во првата група, до Фондот биле предложени девет генерички лекови за хипертензија, срцева слабост, превенција на артеро-тромбоза, Алцхајмерова болест и депресија..
“Со ова, после 15 години ќе биде проширена позитивната листа за првпат, а до крајот на годината се надевам ќе ја прошириме и со нови неколку лекови”, кажа Таравари.
Директорот на Фондот за здравствено осигурување рече дека има дупки во здравствениот буџет но и многу побарувања и очекувања од болници и клиники, според него за десетина дена ќе се знае што ќе биде со Позитивната листа.
Во меѓувреме, пацинетите се осудени современи поефикасни лекови да ги купуваат на приватно,иако плаќаат здравствено осигурување.
Неколку министри досега најавуваа обновување на позитивна листа, но досега тоа не се случи. Не е променета повеќе од една деценија, а на неа има лекови кои одамна се исфрлени од употреба во многу земји.
