Главниот град пред сообраќаен армагедон. Центарот на Скопје допрва ќе се загрчи поради одолговлекувањето на градските власти да ги изведат приклучоците за подземната улица под комплексот Лимак, односно Дајмонд мол.
Новиот трговски, хотелот, катната гаража, како и 3 од вкупно 4те висококатници се веќе изградени, готова е и подземната улица која е дел од комплексот, но од кружните текови кои треба да ја поврзат со околните сообраќајници ни трага ни глас.
Новите 20-катници, веќе подолго време ги рекламираат и продаваат своите станови, кои вкупно треба да се 772 на број, со кои пак Општина Центар ќе добие околу 3.000 нови жители и најмалку 1.000 дополнителни автомобили. Без да се пресмета и канцеларискиот простор во рамки на комплексот, за кој не се знае колку компании и вработени може да се очекуваат.
За подземната улица да профункционира, на нејзината западна страната планирано е да се изведе приклучок со кружен тек на крстосницата кај објектот „Нова Македонија“. Инфраструктурен проект кој се уште не е започнат.
Додека пак на јужната страна од подземната улица, кружен тек е предвиден на крстосницата помеѓу булеварот „Јордан Мијалков“ и улицата „Павел Шатев“, позната како „Бихаќка“, како и кај подвозникот кој ги дели булеварите „Св. Кирил и Методиј“ и „Кочо Рацин“, каде нема знаци дека се одбиваат градежни работи.
За тоа, кога се очекува изведбата на кружните текови и приклучоците, прашавме во Град Скопје, но, оттаму не одговорија.
Од турската компанија Лимак пак, неодмана порачаа дека тунелот за подземната улица е целосно пробиен и оти годинава, треба да биде завршен.
- „Во моментов, бетонските работи на подземниот тунел се комплетно завршени, односно вкупната должина од 746 метри е целосно ископана, со поставени потпорни ѕидови и фундамент. – Одговорија од „Лимак“ за дел од медиумите.
Договорот за изведба на подземна улица беше потпишан уште во 2012, од страна на тогашниот градоначалник Коце Трајановски. Во 2018та, неговиот наследник Шилегов, оддржа пресс конференција заедно со поранешниот премиер Зоран Зоран Заев за почеток на градежните работи, но и по 6 години, Скопје не доби подземен коловоз.
Никола Цветкоски
