Владата како нем набљудувач на лошата економска слика во Македонија. Цените неконтролирано растат, а институциите само си ја префрлаат одговорноста.
Граѓаните прстот го вперуваат во власта, бараат мерки за заштита, ама немаат доверба дека нешто ќе се преземе за да се подобри ситуацијата.
Наглиот и неконтролиран раст на цените се случува веќе неколку пати во последните две години, а надлежните не реагираат соодветно.
Главна причина што нема ни соодветни мерки, ни санкции за несовесните трговци е што Владата во фокус ја има само надворешната политика и не се грижи доволно за домашните проблеми и економијата, сметаат познавачите.
Главната причина е што економските политики се доверени на помалиот коалициски партнер односно на ДУИ, а ДУИ како и секој помал коалициски партнер не е толку одговорен . Тие ќе прават нешто, ама се додека немате вие иницијатива од оној што е одговорен во државата не можете да очекувате дека ќе имате од Министерот за економија некоја иницијатива, а Премиерот е скроз апстрахиран и е скроз посветен на промената на Уставот на евроинтеграциите, земете ги последните негови настапи и видете за што зборувал, никогаш не зборува за сиромаштија, инфлацијата, тоа е првата причина кога имате какафонија, кога Премиерот е одлепен од реалноста, односно фокусиран на надворешната политика, а оние кои се фокусирани на домашната политика не им е толку гајле за тоа, коментира Бранимир Јовановиќ.
Јовановиќ предупредува дека покачувањето на цените се случува без никаква основа , затоа што на глобалните пазари цените не се покачуваат, а куповната моќ на граѓаните не е зголемена оти платите во реална вредност се намалени. Според него итно мора да има замрзнување на цените бидејќи без контрола цените нема да паднат.
Ова се случи неколку пати во изминатите година и пол и сега повторно се случува. Дополнително Владата само гледа и критикува , фирмите се нечовечни и ништо и ништо не преземаат само упатуваат апели фирмите да не се однесуваат на тој начин . Тоа што треба да се направи без никакво сомнение е да се замрзнат цените, бидејќи очигледно без контрола на цените фирмите прават што сакаат, додава Јовановиќ.
За покачените цени министерот за економија Крешник Бектеши прстот го впери кон трговците и побара казни од комисијата за заштита на конкуренција, а од таму пак кажаа дека не можат да постапат ако некој не им доставел писмено сомнение. Премиерот вчера проговори на темата и кажа мерки ќе имало, но конкретно какви и од кога не кажа.
Во последните две недели имаше поскапување на млекото, сирењето , кашкавалот и месото . Нов бран поскапувања се очекуваат откако ќе биде покачено ДДВ-то од 5 на 10% како дел од даночната реформа .
Кристина Алексиеска
