Има или нема отровен зеленчук на македонските пазари? Агенцијата за храна и ветеринарство демантира, но граѓаните се скептични па дома преземаат низа мерки како да го третираат зеленчукот кој што го купуваат.
Пред само 6 месеци, граѓаните испија литри и литри млеко и јогурт пред Агенцијата да повлече повеќе од 20 тони од овие небезбедни производи кои содржеа афлатоксин. Па изгорени на млеко и јогурт, граѓаните сега дуваат и на зеленчук и овошје.
Од Агенцијата за храна и ветеринарство не ни дадоа одговор каде во моментов се наоѓа зеленчукот за кој анализите покажале дека има повисоко ниво на пестициди од дозволнеото.
Најголемата опозициска партија со документи од направени анализи тврди дека домати, краставици, млад кромид и пиперки со небезбедно количество на пестициди со знаење на надлежните завршиле на македонските пазари. Од нив, наместо деманти, бараат оставки.
Инаку, пестицидите се ксеноестрогени, опасни по човековото здравје и затоа што не се биоразградливи, телото ги складира во масните клетки и истите можат да предизвикаат сериозни последици врз човекото здравје.
- Број еден секако спаѓа рак на дојката, рак на тестиси, рак на простата, но тука станува ризик и за неплодност, ендометриоза кај жените , ризик за дебелина и дијабетес. Ксеноестрогените претставуваат еден невидлив непријател со кој што нашата борба допрва започнува, вели ендокринологот, Д-р Надица Божиновска.
Советот на докторите е, секогаш да се отстранува кората на овошјето и зеленчукот, доколку не можеме да си обезбедиме или дозволиме органски производи.
Анастасија Илиевска
