Наместо да увезува поскапо жито од Србија за да ги полни Стоковите резерви, државата треба под итно прво да го откупи македонското жито кое со месеци скапува во нашите амбари, бараат пелагонсиките производители на пченица.
„Ова треба да се направи веднаш, бидејќи сега е време кога треба да се прави втората прихрана на пченицата, дури веќе е и задоцнета, а задоцнета е од причини што луѓето немаат финансиски средства зашто пченицата не им е предадена. Луѓето сега се доведени во ситуација да не бараат којзнае каква цена, туку бараат цена со која може да се покријаат барем производните трошоци и трошоците за складирање, тоа некаде е некоја цена околу 22 денари“, – кажа СТЕВАНЧЕ ЈОРДАНОСКИ, производител на жито од с. Мажучиште.
Според неофијалните информации кои ги имале овие луѓе, увозот на поскапата пченица за Стоковите резерви траел повеќе месеци и тоа по цена од 24-25 денари, а додека во македонските амбари имало уште најмалку од 7.000 до 10 илјади тони, која македонските земјоделци се подготвени да ја дадат по цена од дваестина денари, бидејќи досегашните загуби им се огромни.
„Не ја предадовме пченицата зашто млинарите не можеа да ни ја платат во кеш тогаш, а ако млинарите ја откупеа тогаш по таа цена, па сега да ја мелат и да ја продаваат, и тие ќе немаа сметка. Сега бараме државата да ни ја откупи по реална цена, да биде и за државата добро, а и за нас“, – вели ТОДЕ ЛАЗАРОВСКИ од с. Ивањевци.
„Имам жито за предавање околу 80 тони, не ни е откупено и така стој. Бараме барем по двесетина денари да ни го откупат житото. Загубивме, плаќавме 2.400 денари тарана 50 кила, а сега плаќаме 25 кила – 1.200 денари. И нека пресмета министерот колкава е загубата, тој е поучен, јас сум со 4-то одделение, не знам, па тој нека пресмета. И житото ќе остане и нема да се произведува“, – рече ДИМЧЕ БЕЛЕВСКИ од Могила.
Житопроизводителите велат дека мерките од Владата за намалување на цената на лебот се погрешни, особено што цената на житото била вратена назад дури за 10 денари. Тие тврдат дека тоа отишло на директна штета на земјоделците, што пак, перспективно ќе резултирало со се’ поголем недостиг на храна во земјава.
За овие наводи, одговор побаравме директно од Владата. Оттаму ни беше речено дека штом ќе ги комплетирале сите податоци за состојбите со пченицата во Стоковите резерви, информацијата ќе ни биде доставена.
Каролина Дурло
