И покрај негодувањето на бизнис заедницата, Владата го усвои таканаречениот Закон за солидарност со кој компаниите ќе плаќаат данок на екстра профит. Законот кој треба да го помине собранискиот филтерќе ги опфати сите сектори кои во последната година оствариле поголем профит од просекот кој ќе биде земен од последните 4 години.
Според Министерот за економија Крешник Бектеши , ако ЕУ ни дала 80 милиони за економска поддршка, сме морале и ние да покажеме подготвеност , па за полнење на државната каса, Владата одлучи да удри по компаниите со Законот за солидарност.
Ако знаеме дека ЕУ за нашата држава обезбедила 80 милиони евра во делот на справување со енергетската криза, секако дека ние треба да покажеме посветеност и тие кои направиле дополнителни добивки да плаќаат повеќе споредбено со тие кои биле целосно поддржани од страна на државата за да опстојуваат и да ги зачуваат работните места, објасни Бектеши.
Бектеши уверува дека екстра профит ќе плаќаат и компаниите кои се во секторот енергетика, а постојат една или помалку од една година .
Уште од најавата за законското решение бизнисот силно алармираше дека ваквиот данок не е фер затоа што ако некој успеал да заработи со ограничени ресурси за време на корона кризата и енергетската криза сега тие пари им се одземаат, и дополнително ваквиот данок може да ги одбие странските инвеститори.
Дополнителен удар за компаниите е и растот на каматните стапки кај банките , со оглед на растот на основната каматна стапка од страна на Народна банка. За една година, каматните стаки според пресметките на Народна банка се зголемиле од од 3,22 проценти на 5, 02 процент. Ако се земат во предвид не толку оптимистичките прогнози на експертите, предвидувањата се дека каматните стапки ќе растат.
Кристина Алексиеска
