Непроценливо вредно археолошко богатство крие античкиот град „Стибера“, во непосредна близина на прилепското село Чепигово. Оваа непресушна ризница на извонрено вредни артефакти, главно мермерни бисти, скулптури и статуи, но и други предмети од мермер, на прагот од новата календарска година чека државата конечно да покаже добра волја и согласно своите ингеренции да им понуди соодветна експропријација на жителите од селото Чепигово во чија сопственост се наоѓа земјиштето каде што се наоѓа овој локалитет, познат и како Македонската Помпеја. Нерешените имотно-правни односи, незаслужено Стибера ја ставаат во сенка на другите макеодонски антички градови, иако нејзината археолошка вредност е многу позначајна, смета археологот Душко Темелкоски, кој повеќе години работи на овој локалитет.
„Терминот „Македонска Помпеја“ за Стибера во научната-стручна литература го внесол покојниот професор д-р Иван Микулчиќ уште кога почнува да се откриваат во 1953/54 година, првите градби во Стибера и понатаму во осумдесеттите и деведесеттите години од минатиот век. Се пронаоѓаат на мал простор во сите градби на Стибера, голем број на скулптури на божества и на видни граѓани кои што пленат со својата извонредна изработка. На други локалитети во Македонија се најдувани скулптури од мермер, меѓутоа не во толкава голема бројка и така репрезентативно изработени како што се во Стибера“, – обајснува Душко Темелкоски, археолог при НУ „Завод и Музеј“ – Прилеп.
Според Темелкоски, фактот што во Македонија немало вулканска лава како во Помпеја, а која го покрила целиот град што всушност го овозможило и сочувувањето на толку многу артефакти таму, откриеното подземно богатство во нашата Помпеја, односно во Стибера, го прави уште поимпозантно.
„Овдека не е сочувано од лава, меѓутоа еве, имаме сешто сочувано под земјата и којзнае што уште не крие Стибера под земјата на тој простор во околината на селото Чепигово“, – посочува Темелкоски.
Инаку, досега во ова античко археолошко наоѓалиште откриени се преку триесет мермерни наоди, бисти и скулптури на божества и видни граѓани од тоа време, кои се изложени во музеи како во земјава, така и надвор од неа.
Каролина Дурло
