60 проценти од граѓаните ја оценуваат работата на Владата и премиерот како неуспешна, додека 20 проценти од испитаниците сметаат дека Владата добро се справува со економските проблеми, покажува истражувањето на МКД.мк кое го спроведе агенцијата Маркет вижн. На скалата од 1 до 5, и Владата и премиерот добиле оценка- двојка.
За дури 72 проценти од испитаниците економската состојба е лоша, а многу мал дел, или приближно 14% сметаат дека е добра. 11,8% македонски граѓани одговориле во анкетата дека економската состојба се подобрува, а за околу половина таа се влошува. Исто толку, или речиси една половина од граѓаните сметаат дека се влошуваат и условите за водење бизнис или инвестирање.
Од анкетата може да се заклучи дека вработените во јавниот и во приватниот сектор различно ја оценуваат економската состојба во земјава. За вработените во приватните фирми, економската состојба е понеповолна, за разлика од вработените во администрацијата.
10% од испитаниците живеат во сиромаштија и недостиг од основни добра, а приближно 40% се изјасниле дека многу внимателно трошат за да врзат крај со крај.
Ова е третиот дел од анкетата на порталот мкд.мк спроведена од агенцијата Маркет Вижн. Вториот дел беше објавен вчера, кој покажува дека пред наредните избори ВМРО-ДПМНЕ води пред СДСМ со 1,7%. Првиот дел од анкетата, пак, откри, дека корупцијата и нефункционалноста на правниот систем се дел од најголемите проблеми во развојот на Македонија.
Анкетирањето било спроведено телефонски, во периодот од 18 јуни до 23 јуни на репрезентативен примерок од 1.200 испитаници.
