Во недела на Алфа Тв стартува нова емисија, која ќе обработува теми од економијата, бизнисот и секојдневието. Автор на „Бизнис поенти“ е Билјана Василева Трендафилова, која има долгодишно телевизиско искуство во македонските медиуми. Трендафилова најавува економски анализи, атрактивни гости и интересни дебати во кои гледачите ќе слушнат различни ставови на актуелни теми.
Од недела на Алфа Тв стартува новиот економски магазин, што ќе им понудите на гледачите?
Во емисијата ќе ги сумираме Бизнис поентите од соговорниците кои ќе учествуваат, а пракса ќе биде секако да имаат различни ставови на одредени прашања. Ќе понудиме брза и гледлива економска емисија, преку која гледачите ќе можат да се информираат за актуелните теми. Целта ни е секоја вест и проблем кој ги засегнува гледачите, да го добие заслужениот третман и простор.
Сметате ли дека во Македонија има доволно атрактивни теми за да се пополни економска емисија?
Се разбира дека има. Впрочем се е сведено на економија и пари, ако ги прашате и обичните луѓе тие ќе ви речат оти преку глава им е од политика, сакаат да слушнат многу повеќе за нивната живеачка, стандард, цените на горивата и комуналиите.Не само граѓаните, туку таргет на оваа емисија ќе бидат и бизнисмените, кои во последиот период отворено зборуваат за проблемите и кризата низ која поминува македонското стопанство.
Во телевизискиот етер има силна конкуренција од информативни емисии. Како ќе се борите за своето место на пазарот?
Алфа е национална телевизија која ужива доверба кај гледачите. Медиумот има своја публика која ги лови добрите емисии. Впрочем во време кога сме и во изборна кампања, добро ќе биде да се слушнат ставови на луѓе од економската и бизнис фела, кои реално ќе зборуваат за економската иднина на земјава.
Со кои соговорници ќе ја отворите емисијата?
Во „Бизнис Поенти“ оваа недела економските аргументи ќе ги спротистават актуелната министерка за финансии, Нина Ангеловска и поранешниот министер за финансии, универзитетскиот професор, Трајко Славески.
Гледајте не во недела во 18.00 на Алфа Тв.
