Исланд, земја која брои само 364.000 жители, започна со масовно тестирање.
Студијата објавена оваа недела во американското научно списание New England Journal of Medicine од исландски научници и локалната компанија deCODE Genetics, подружница на американски Amgen ги прикажа резултатите од тестирањето, почнато на 31 јануари, пред болеста предизвикана од коронавирус дури и да го добие името COVID-19 и повеќе од еден месец пред да се прогласи пандемијата.
Со програмата се реализирани две кампањи на тестирање. Со едната, опфатени се лица со симптоми слично на оние предизвикани од коронавируси и лица кои се вратиле од најризичните земји или кои биле во контакт со заразените. Тие тестирања покажале дека 13,3 отсто од над 9.000 тестирани луѓе биле заразени.
Втората кампања, покрената од deCODE Genetics на 13 март за остатокот од популацијата, тестирани се Исланѓани без симптоми или со благи симптоми кои не биле во изолација. Во таа популација процентот на позитивни случаи се движи меѓу 0,6 и 0,8 отсто.
Студијата откри дека дури 43 отсто од луѓето кои биле позитивни на тестот немале никакви симптоми или немале во моментот на тестирање.
Анализите покажуваат дека, на почетокот, болеста ја донеле Исланѓаните кои се враќале од Италија и Австрија. Потоа, патници од Велика Британија, пред таа земја да бидат прогласени за ризична, што значи дека вирусот кружел меѓу Британците уште од претходно.
Според најновите статистички податоци, во Исланд има 1.739 потврдени случаи, од кои 1.144 оздравеле, а 8 починале.
