– Собраниската Комисија за политички систем и односи меѓу заедниците, на денешната 89-та седница, со осум гласа „за“, едногласно донесе одлука за одржување јавна расправа по работната верзија на Предлог-законот за организација и работа на органите на државната управа.
На 89-тата седница, претседателот Љупчо Пренџов информираше дека Комисијата за политички систем и односи меѓу заедниците, согласно член 129 од Деловникот за работа на комисиите, има можност да одлучува за одржување седница за јавна расправа. По отворањето на дискусијата, предлогот беше ставен на гласање и доби поддршка од осум пратеници, без гласови „против“ и „воздржани“.

– За известител на седницата ја определувам пратеничката Благица Ласовска. Со оглед на тоа дека нема никој од страна на ниту една опозициска партија, сакам да најавам дека јавната расправа ќе се одржи во понеделник, со почеток во 10 часот, во салата „Борис Трајковски“ и ќе трае околу два до два и пол часа – рече Пренџов.

Тој ги повика пратениците и пратеничките групи од опозицијата да учествуваат во јавната расправа и да предложат учесници кои можат да придонесат во разгледувањето на предложените законски решенија.

