Во организација на Институтот за социолошки и политичко-правни истражувања при УКИМ и Истражувачкиот центар за ареална лингвистика „Божидар Видоески“ при МАНУ, денеска ќе се одржи научен собир на тема „Негирањето на посебноста на македонскиот јазик и македонската нација како форма на политички говор на омраза“.
Собирот произлегува од научноистражувачкиот проект „Негирањето на посебноста на македонскиот јазик и политичката легитимност на македонската нација како форма на политички говор на омраза“ и има цел да поттикне научна и интердисциплинарна дискусија за негирањето на македонскиот јазик и националниот идентитет, нивните политички, правни, општествени и културни импликации, како и прашањата поврзани со човековите права, дискриминацијата и современите регионални и европски процеси.
Како што наведуваат од Програмскиот и Организацискиот одбор на научниот собир, преку научните излагања и дискусиите, собирот ќе придонесе кон пошироко разбирање на овие прашања и нивното значење во современиот општествен контекст.
Научниот собир ќе го отвори академик Марјан Марковиќ, а поздрави обраќања ќе имаат проф. д-р Ганка Цветанова од ИСППИ при УКИМ и академик Катица Ќулавкова од ИЦАЛ во МАНУ.
