Со звуците на традиционалните народни инструменти и фолклорните изведби на познатите македонски ора, вчеравечер во преполниот хол на основното училиште „Кочо Рацин” се одржа традиционалниот концерт на ФА „Мегдан” по повод 5 ноември, Денот на ослободувањето на Дојран.
Играорците од фолклорната секција од Дојран, заедно со богданските членовите на фолклорниот ансамбл ги изведоа добро познатите Малешевка, Копачија, Повардарие, Источна, Копачка, Водарки, Македонско девојче и Црногорка.
Посебна тежина на настапот даде професионалната музичка изведба на народниот оркестар при ДМУЦ „Сергеј Михајлов” од Штип, како гости на целовечерниот концерт.
Концертот кој е дел од програмата за одбележувањето на 5 ноември, Денот на ослободувањето на Дојран, е под покровителство на Министерството за култура и туризам и на Општина Дојран.
