Искуствата и препораките на младите за унапредување на интегритетот и спречување на корупцијата ќе бидат во фокусот на Националниот форум „Млади за интегритет – Од гласот на младите до институционални промени“, што ќе се одржи денеска во Скопје.
Настанот, во организација на Аналитика – Скопје, претставува завршен национален настан во рамки на проектот „Млади за интегритет: Проширување на младинските антикорупциски активности во Северна Македонија“ и ќе обедини претставници на институциите, образовниот сектор, граѓанските организации и младите.
Форумот предвидено е да го отвори министерката за образование и наука Весна Јаневска, а во центарот на дискусиите ќе бидат младинските ставови и препораки за јакнење на интегритетот и намалување на корупцијата.
Во рамки на настанот е предвиден интерактивен форум-театар и две тематски панел-дискусии, преку кои младите ќе имаат можност директно да ги претстават своите идеи и предлози пред институционалните претставници и да придонесат кон креирање конкретни решенија.
