Меѓуетничките односи во државата, значењето на Охридскиот рамковен договор и зачувувањето на неговите вредности, како и предлог-законот за соодветна и правична застапеност биле во фокусот на средбата помеѓу министерот за односи меѓу заедниците, Агон Ферати, со францускиот амбасадор во земјава, Кристоф Ле Риголер.
Како што соопштуваат од кабинетот на министерот, на средбата била потврдена подготвеноста за натамошно унапредување на соработката и поддршката на евроинтегративниот процес на државата.
– Амбасадорот ја поздрави понудата за натамошна соработка и ја истакна важноста од негувањето на добрите меѓуетнички односи, третирањето на Охридскиот рамковен договор како дел од заедничкото наследство, како и зачувувањето на неговиот дух. Тој се интересираше и за предлог-законот за соодветна и правична застапеност, посочувајќи дека Франција, од усвојувањето на Методологијата во 2019 година, останува посветена на унапредувањето на земјите кандидатки на патот кон членство во Европската Унија, како и на нивниот пристап до заедничкиот пазар и различните програми на Унијата. Амбасадорот се осврна и на најновиот предлог на Европската комисија, нагласувајќи дека треба да се почека за да се види дали истиот ќе биде одобрен и од Европскиот совет – стои во соопштението.
Ферати, како што се наведува во соопштението, го информирал амбасадорот и за владините политики за правична распределба на финансиските средства меѓу општините, како и за активностите насочени кон подобрување на можностите за младите.
На средбата биле презентирани и идеи за одбележување на 25 години од потпишувањето на Охридскиот рамковен договор, со цел натамошно зајакнување на социјалната кохезија во земјата.
