По повод Светскиот ден на менталното здравје -10 Октомври, Младинската школа на ФК Вардар и „Психограм“ спроведоа седумдневна кампања посветена на менталното здравје на младите спортисти.
Како што информираат од Младинската школа на ФК Вардар и „Психограм“, во кампањата биле опфатени сите генерации во школата, од деца родени во 2019 до деца родени во 2014 година, со вклучување на нивните родители и тренери.
Преку секојдневни пораки, практични задачи, работни листови и разговори, децата биле поттикнати да ги препознаваат и изразуваат своите чувства, да развиваат самодоверба и да учат како да се справуваат со грешките, притисокот и предизвиците на теренот. Посебно внимание било посветено на радоста во играта, меѓусебната поддршка и чувството на припадност во тимот.
Во кампањата биле вклучени и возрасните што го обликуваат спортското искуство на децата. Родителите и тренерите добиле насоки за поддржувачка комуникација, реални очекувања и создавање средина во која детето може да учи, да погреши и да напредува без страв. Акцијата бил пријавена во Комората на психолози како дел од одбележувањето на Светскиот ден на менталното здравје.
Со оваа иницијатива, Младинската школа на ФК Вардар и „Психограм“ покажуваат како грижата за менталното здравје и менталниот тренинг можат да станат составен дел од работата во една спортска школа. Ваквиот пристап, како што посочуваат, има вредност и надвор од локалната средина и може да послужи како пример за спортски школи што сакаат да го поддржат целосниот развој на младите спортисти.
-Пораката на кампањата е јасна: покрај физичката, техничката и тактичката подготовка, на децата им се потребни психолошка поддршка, разбирање и простор да ја играат својата игра. Успехот во детскиот спорт се гледа и во тоа колку децата се чувствуваат сигурни, прифатени и мотивирани да продолжат да спортуваат – велат од Младинската школа на ФК Вардар и „Психограм“.
