Претседателот на Националниот совет за евроинтеграции, Венко Филипче, потпретседателката на Собранието, Весна Бендевска, и пратениците Иванка Василевска и Игор Здравевски оствариле средба со холандска делегација, предводена од Хелен Бакер, заменик-министерка за надворешни работи на Кралството Холандија и генерална директорка за европска соработка при Министерството за надворешни работи на Холандија.
Како што информираат од собраниската прес-служба, Филипче изразил благодарност за континуираната поддршка од Кралството Холандија за нашата земја на патот кон членството во Европската Унија.
Во фокусот на разговорите биле процесот на европската интеграција и исполнувањето на Копенхагенските критериуми, со посебен акцент на владеењето на правото, независните медиуми, заштитата на ранливите категории граѓани и обезбедувањето независно судство.
Соговорниците размениле мислења и за безбедносната состојба во Европската Унија, Планот за раст за Западен Балкан, како и за можностите и придобивките од заедничкиот европски пазар.
На средбата била потврдена важноста од продолжување на соработката и размената на искуства во процесот на европската интеграција, како и од понатамошната поддршка за реформите насочени кон усогласување на земјата со европските стандарди.
