Општина Делчево потпиша договор за реконструкција на водоводната мрежа во Старо Делчево, со што, како што информира градоначалникот Иван Гоцевски, се продолжува со подобрување на водоснабдувањето и условите за живот на жителите во овој дел од градот.
Вредноста на договорот изнесува 890.608 денари со вклучен ДДВ. Средствата се обезбедени од Министерството за транспорт, со финансиско учество на Општина Делчево.
Изведувач на работите е скопската компанија „ВОД-ВАР ИНЖЕНЕРИНГ“, а предвидениот рок за завршување на реконструкцијата е 30 ноември 2026 година.
Гоцевски истакна дека вложувањето во водоводната инфраструктура е вложување во основните потреби на граѓаните, посочувајќи дека со реконструкцијата се очекува подобрување на сигурноста и функционалноста на водоводната мрежа во Старо Делчево.
– Вложувањето во водоводната инфраструктура е вложување во основните потреби на граѓаните. Со оваа реконструкција работиме на подобра и посигурна мрежа, затоа што квалитетното водоснабдување е неопходно за секое домаќинство, наведува Гоцевски.
Од Општината посочуваат дека и во наредниот период ќе продолжат со реализација на инфраструктурни проекти насочени кон подобрување на условите за живот и секојдневното функционирање на граѓаните.
