Министерството за внатрешни работи ги потсетува сопствениците и возачите на возила со странски регистарски ознаки дека преку системот „Безбеден град“ се регистрираат сообраќајни прекршоци сторени со овие возила.
Во денешното соопштение на МВР се истакнува дека за полесно и побрзо информирање и регулирање на евентуално евидентираните прекршоци во функција е веб-апликацијата со мобилен интерфејс „Безбеден град“.
– Преку апликацијата сопствениците и возачите може да се регистрираат, да проверат дали со нивното возило е евидентиран сообраќаен прекршок, да добијат увид во издадените прекршочни платни налози и да извршат електронско плаќање. Користењето на апликацијата не е задолжително. Таа претставува олеснителна можност преку која прекршоците може да се проверат и регулираат однапред, со што се олеснува и забрзува постапката при излез од државата. За оние што не ја користат апликацијата, информација за евентуално евидентиран сообраќаен прекршок може да се добие и при излез од државата, на граничниот премин Табановце. На овој граничен премин плаќањето може да се изврши со платежна картичка, а плаќање во готовина не е предвидено – се додава во соопштението на МВР.
Министерството за внатрешни работи нагласува дека презема активности за проширување на можноста за информирање и подмирување на обврските поврзани со евидентираните сообраќајни прекршоци и на други гранични премини.
