Шестмина уапсени се во денешената акција за тероризам на Министерството за внатрешни работи и Обвинителството за гонење организиран криминал и корупција, дознава Алфа. Кај нив било пронајдена поголема количина оружје – пушки и пиштоли, но дополнително неофицијално при претресите на територија на Скопје откриено било и нелегално поседување крипто валути.
Членовите на групата се поврзуваат и со Исламската држава односно кај нив биле пронајдени предмети кои упатуваа за врска со ИСИС.
Акцијата што ја спроведува полицијата и обвинителството, била по претходни оперативни сознанија од Агенцијата за национална безбедност.
Се очекуваат официјални информации од органите на прогонот. ОЈО за ГОКК потврди за акцијата:
-Под раководство на јавен обвинител од ОЈО ГОКК на територија на Скопје во тек е акција на МВР и АНБ на повеќе локации. Приведени се повеќе лица поради сомнение за сторени кривични дела од областа на тероризмот. По завршување на акцијата, јавноста ќе биде информирана – информираат од ОЈО ГОКК.
Одзмени биле и мобилни телефони и лаптопи, кои најверојатно ќе бидат предмет на проверки од органите на прогонот. Токму истрагата во тој дел треба да дадат одговори со кого комуницирале уапсените, но и дали има и други инволвирани.
Од почетокот на годината полицијата има спроведено најмалку три акции од областа на тероризмот и злосторничко здружување. Една група се поврзуваше со пропаганда на исламската држава, а во Мала Речеца пак „Тигрите“ уапсија едно лице поради сериозна онлајн закана за масовно убиство а одземена му беше голема количина оружје.
