Сиромаштијата не е само празен паричник, таа значи и тешко достапно образование и здравство, невработеност и недостиг на основни услови за домување. Шест проценти од населението во Македонија, односно околу 35.000 домаќинства, се засегнати од ваков тип на сиромаштија покажуваат наодите од научно-истражувачкиот проект „Детерминанти на повеќедимензионалната сиромаштија“. Анализата покажува дека најчесто бараниот излез на граѓаните е можноста за вработување и стабилен приход, но поддршката не треба да се сведува само на социјална помош од централната власт – потребни се мерки и на локално ниво, самоуправните установи и општините:
„Тие самите не сакаат да зависат од парична помош, што патем не се иднексира со порастот на трошоците, односно не е основицата порасната толку колку што е минималната плата. Она што тие го бараат е да имаат пристап до вработување и тука она што е потребно не е само централната власт, тие ги повикуваат општините, локалната власт, од нив на заеднички начин да се најдат можности да овие луѓе бидат повеќе вработени“, изјави проф. Д-р Маја Геровска Митев, професор на Филозофски факултет при институтот за социјална работа и политика.
Истражувањето опфаќа 80 општини, а сиромаштијата е мерена преку 12 социо-економски индикатори. Дел од нив се однесуваат на тоа колку граѓаните се оддалечени од училиштата, здравествените установи, рекереативните и зелени површини. Најпогоден е Југоисточниот регион, додека пак скопскиот регион има најниска стапка од 2,3 проценти. Највисок удел е регистриран во Чашка, каде што се зафатени 71% од домаќинствата, а високи стапки има и во Старо Нагоричане, Конче, Могила и Новаци.
„Луѓето се наоѓаат и се доведуваат до ситуација да бидат корисници на системот за социјална заштита, од сосема поинакви причини одколку само недостаток на приходи. Тоа е немање на соодветна здравствена заштита, немање на соодветно образование, немање на пристап во местото каде што живеат до можности за вработување“, вели Геровска Митев.
Податоците од истражувањето се достапни и преку АТЛАС – платформа, која овозможува сиромаштијата да се следи по општини и региони, со цел да се добие појасна слика за тоа каде и каква помош е најпотребна.
