Со емотивна почит и сеќавање на младата ракометарка Андреа Ампова, во Делчево денеска беше отворен вториот меѓународен меморијален ракометен турнир што го носи нејзиното име.
Турнирот, кој се одржува на 5 и 6 септември, ги обедини младите ракометарки преку спортот, дружењето и заедничкото сеќавање на Андреа, чија голема љубов бил ракометот. На турнирот учествуваат екипи од Македонија, Србија и Бугарија.
На свеченото отворање беше упатена порака дека турнирот не е само натпреварување, туку начин преку спортот да се зачува споменот за Андреа и вредностите што ги носат пријателството, дружењето и спортскиот дух.
– Секој гол, секоја одбрана и секоја насмевка посветете ѝ ја на Андреа. Замислете ја на теренот меѓу вас или како најгласниот навивач на публиката, беше порачано на отворањето.
Во чест на Андреа беше одржано и едноминутно молчење, по што следуваше интонирањето на химната на Република Северна Македонија.
На второто издание на турнирот настапуваат домаќинот РК „Делчево“, како и екипите „Илинден Вардар“, „Астибо“ и „Спартак“ од Македонија, „Пирин“ од Бугарија и „Топличанин“ од Србија.
Градоначалникот на Општина Делчево, Иван Гоцевски, на свеченото отворање истакна дека ваквите настани се пример како младите го чуваат споменот на своите другари и преку спортот градат пријателства и заедништво.
– Денешниот настан треба да стане традиција. Како локална самоуправа ќе помагаме колку што можеме ваквите настани да продолжат да сведочат за младоста, спортот и љубовта кон другарството, порача Гоцевски.
Тој упати порака и до семејството на Андреа, нагласувајќи дека додека младите од Македонија и од Балканот играат во нејзина чест, споменот за неа ќе продолжи да живее.
Меморијалниот турнир е посветен на негување на споменот за Андреа Ампова, промовирање на спортот кај младите и јакнење на спортската култура и заедништвото во Делчево. Истата цел беше истакната и при организацијата на првото издание во 2025 година.
– Нека ракометот биде јазикот што ќе нè обедини. Нека победува ферплејот, пријателството и спортскиот дух, а секој гол, секој аплауз и секој момент нека биде за Андреа, беше порачано на свеченото отворање.
Дводневниот турнир во Делчево ќе донесе натпревари, дружење и нови спортски спомени, но пред сè ќе биде уште еден начин името и споменот на Андреа Ампова да останат живи преку ракометот.
