Во организација на невладината ТАКТ, со поддршка на Секторот за развој од Општина Карпош, денеска се одржа настан, односно Локален граѓански дијалог, кој е дел од проектот „FAIR GAME“, кофинансиран од Европската Унија. Настанот се одржа во рамки на Младинскиот центар – Карпош, кој функционира во просториите на спортскиот објект „Наум Наумовски Борче – Партизан“. На средбата присуствуваа граѓани, спортски работници, претставници од невладини организации, вработени од општинската администрација и градоначалникот на Општина Карпош, Сотир Лукровски. Во оваа пригода, првиот човек на Општината ги поздрави присутните, при што истакна дека локалната самоуправа и понатаму ќе продолжи да дава силна поддршка на ваквите инклузивни иницијативи, кои ги поттикнуваат младите и заедницата кон креирање на подобри вредности.
– „Нашата цел е отворено да зборуваме, да ги идентификуваме бариерите и да создадеме подобри можности за поголемо и подеднакво учество на жените и девојките во спортот и физичката активност“ – посочи Лукровски.
Во рамки на настанот беше презентиран проектот „FAIR GAME“, по што учесниците формираа неколку работни групи, преку кои развија интерактивна дискусија и понудија конкретни предлози и сугестии. Целта на дијалогот беше на едно место да се обединат граѓаните и спортската јавност со претставниците на локалните институции, граѓанските организации и образовните установи. Заеднички беа разгледани предизвиците и бариерите со кои се соочуваат жените и девојките во спортот, но и можностите за нивно поактивно и рамноправно учество во спортските и физичките активности.
Проектот „FAIR GAME“ се реализира во партнерство со повеќе европски организации и институции. Од Македонија, покрај Општина Карпош, партнер е и невладината организација ТАКТ (Together Advancing Common Trust). Во проектот учествуваат и ALDA – European Association for Local Democracy, Provincia di Vicenza и Vicenza Calcio Femminile од Италија; Grad Zagreb и Sportski savez Grada Zagreba (SSGZ) од Хрватска; Município de Macedo de Cavaleiros и Associação de Futebol de Bragança од Португалија; Gradska uprava Zavidovići и ALD Zavidovići од Босна и Херцеговина, како и Komuna e Pejës и Local Democracy Agency од Косово.
Преку ваквите иницијативи, Општина Карпош продолжува да создава простор за отворен дијалог, активно учество на граѓаните и поттикнување на еднакви можности во спортот, со посебен фокус на младите и жените.
