Ново заострување на односите меѓу Грција и Турција поради два морски национални паркови што Анкара ги прогласи во Егејското Море и Источниот Медитеран.
Парковите Фетије-Каш и Северен Егеј опфаќаат повеќе од 23 илјади квадратни километри, а дел од зоните се во близина на грчкиот остров Кастелоризо и меѓу островите Лемнос и Самотраки.
Атина остро реагира и тврди дека Турција еднострано прогласува заштитени зони и надвор од својата јурисдикција. Од грчкото МНР велат дека ваквите одлуки не можат да ги променат грчките права според меѓународното право.
Анкара, пак, одлуката ја образложува со заштита на морските екосистеми. Сепак, потегот повторно ги отвора долгогодишните спорови околу поморските граници и правата на грчките острови во Егејот.
Кастелоризо останува една од најчувствителните точки, а новите паркови се уште еден извор на тензии меѓу двете земји.
