Грција се соочува со нов бран разорни пожари во екот на туристичката сезона. Најтешко е на островот Саламина, западно од Атина, каде два пожари избувнаа речиси истовремено и брзо се проширија поради силниот ветер.
Во огнот загинаа постар брачен пар, а девет лица се повредени. Над 500 жители и туристи беа евакуирани, дел од нив со пловила на крајбрежната стража. На терен се ангажирани околу 190 пожарникари, со десетици возила и воздушна поддршка.
Пожарникарите продолжуваат да се борат со огнените жаришта и на островот Скирос, каде пожарот е активен втор ден. Две помали населби беа превентивно евакуирани, а околу 100 пожарникари, авиони и хеликоптери се ангажирани во гаснењето.
Само неколку дена претходно, над 300 жители и туристи беа евакуирани со чамци од туристичкото место Сивири на Халкидики, откако пожарот се приближи до куќи и туристички објекти.
Високите температури, сушата и силните ветрови го зголемуваат ризикот од нови пожари. Грчките власти преку системот 112 издаваат предупредувања и наредби за евакуација, а граѓаните и туристите се повикуваат строго да ги следат инструкциите на службите.
Грција останува под висок ризик од пожари, додека службите се обидуваат да ги стават активните жаришта под контрола и да спречат нови евакуации во туристичките региони.
