Во сообраќајна контрола вчера и денеска полицијата открила неколку лица кои возеле без возачка дозвола, меѓу кои и 63-годишник од Виница, а 15-годишен од Скопје е уапсен зашто возел камион. Во повеќето случаи возилата се одземени, а по целосно документирање ќе следуваат соодветни пријави.
Во полицискиот билтен МВР информира дека малолетникот бил лишен од слобода ноќеска во 2:40 часот, при сообраќајна контрола на ул.„Горно Лисиче“. Полициските службеници од СВР Скопје сопреле товарно возило „ивеко“ со скопски регистарски ознаки, при што било констатирано дека малолетникот го управувал товарното возило во присуство на неговиот родител пред да се стекне со право за управување возило.
Во 00:55 часот во Скопје денеска полицијата го лишила од слобода и Ф.Б.(30) од скопското село Арачиново. При сообраќајна контрола на ул.„Венјамин Манчуковски“ во Скопје, полициските службеници сопреле патничко возило „сеат леон“ со скопски регистарски ознаки, при што било констатирано дека Ф.Б. го управувал возилото пред да се стекне со право за управување возило.
Приведени вчера биле и 18-годишниот скопјанец Е.С., откако при сообраќајна контрола на ул.„Христијан Тодоровски Карпош“ во Скопје полицијата сопрела „фолксваген голф“ и открила дека тој нема возачка дозвола, исто како и А.Б.(22) од скопско Батинци, кој без дозвола исто така управувал „фолксваген голф“, а во 2:20 часот денеска на ул.„Круме Волнароски“ во Прилеп, лишен од слобода бил и 19-годишниот С.И.од Прилеп додека без дозвола возел „рено”.
Покрај малолетници и адолесценти приведен од полицијата бил и 63-годишниот З.Х. од Виница, вчеравечер во 21:20 часот на улица „Маршал Тито“ во Неготино. Полициски службеници од ОВР Неготино го лишиле од слобода откако му го сопреле возилото „фолксваген пасат“ кое го управувал без стекнато право за управување возило.
МВР информира и дека вчера во 15:00 часот на крстосница од ул.„Димо Наредникот“ со ул.„Александар Македонски” во Прилеп, лишен од слобода бил и 61-годишник И.А. од Прилеп, возач на мопед, откако при контрола на сообраќајот полицајци го сопреле и утврдиле дека го управувал без да поседува возачка дозвола.
