По повод големиот македонски национален празник Илинден, делегација на Македонската алијанса за европска интеграција (МАЕИ), предводена од претседателот Васил Стерјовски, положи свежо цвеќе на споменикот на борците во селото Туминец, Општина Пустец.
Споменикот е подигнат во чест на илинденците, како и на борците од Туминец кои се приклучија на македонските партизански одреди и учествуваа во борбата за ослободување на Македонија од фашизмот и нацизмот за време на Втората светска војна.
Со овој чин, делегацијата на МАЕИ им оддаде почит на сите кои ги положија своите животи за слободата, националното достоинство и идеалите на македонскиот народ, истакнувајќи дека Илинден останува вечен симбол на борбата за слобода, правда и национална самобитност.
Од МАЕИ порачаа дека негувањето на историското паметење и почитта кон жртвата на претходните генерации претставуваат обврска кон иднината, особено за Македонците во Албанија, кои и денес продолжуваат да го чуваат својот национален идентитет, јазик, култура и традиција.
Споменикот, посветен на македонските херои од овој крај, на 10 мај го откри премиерот Христијан Мицкоски, чиј ктитор е тој. Пред големиот број нашинци од сите делови на Мала Преспа и пошироко, на свеченоста по повод откривањето, истакна дека на Македонија денес повеќе од сè и е потребно обединување околу националните интереси и иднината на нашите деца.
-Да се обединиме околу националните интереси. Околу иднината на нашите деца. Околу почитта кон сопствената историја и достоинството на народот. Нашите предци не се делеа кога ја бранеа слободата. Не прашуваа кој од каде е, ниту кој на кого припаѓа. Сите стоеја под едно име – Македонија, рече тогаш премиерот, порачувајќи дека Македонците во Албанија се нераскинлив дел од македонското национално ткиво.
Од манифестацијата одржана под мотото „Чест за хероите, завет за иднината“, Македонците изкажаа благодарност до премиерот Мицкоски убедени, како што порачаа, дека не се сами.
