Со положување цвеќе на Споменикот на слободата и на споменикот на Никола Карев во Паркот на Револуцијата, во Кочани денеска беше одбележан големиот национален празник 2 Август – Илинден.
На одбележувањето присуствуваа градоначалникот на Општина Кочани Владко Грозданов, членови на Советот на Општината, како и општински граѓански и партиски делегации.
Градоначалникот Грозданов посочи дека Илинден обединува две историски пресвртници – Илинденското востание од 1903 година и Првото заседание на АСНОМ од 1944 година, нагласувајќи дека тие претставуваат темели на македонската државност.
-2 Август не е само обичен датум. Тој обединува два различни датума, една идеологија, многу генерации и една визија – татковината. Илинденците во 1903 година се охрабрија и го подигнаа својот глас, знаејќи дека се многу послаби од противникот, но оставајќи ги своите коски во темелите на нашата држава- истакна Грозданов.
Тој потсети дека на 2 Август 1944 година, на Првото заседание на АСНОМ во манастирот „Св. Прохор Пчињски“, државотворната идеја добила институционални темели, а со независноста во 1991 година Македонија станала суверена држава.
-Со осамостојувањето, еве денес, можеме гордо да кажеме дека живееме во слободна држава, го зборуваме мајчиниот јазик и ги градиме институциите самите ние. Слава на хероите. Благословена да е утробата на секоја мајка што ќе го продолжи македонскиот род. Благословени да се нашите наследници. Ние сме должни да го браниме заветот, а аманетот нека остане за идните генерации. За многу години, нека е вечен Илинден, да е вечна Македонија- порача градоначалникот на Кочани.
Честитка по повод големиот празник Илинден упати и пратеникот во Собранието, Миле Лефков.
– Со положување свежо цвеќе на Споменикот на слободата и на споменикот на Никола Карев овде во Паркот на Револуцијата оддаваме почит на сите што се бореле за независна Македонија и ги оставиле своите животи. Илинден не е само наша историја Илинден е и наш завет за иднината за да градиме просперитетна, демократска, развиена и горда Македонија. Нека ни е вечен Илинден, нека ни е вечна Македонија – рече Лефков.
