Министерот за јавна администрација Горан Минчев упати честитка до граѓаните по повод 2 Август – Илинден, Денот на Републиката, истакнувајќи дека овој празник е најсветлиот симбол на македонската државност, слободарскиот дух и вербата во сопствената иднина.
-Илинден е најсветлиот симбол на нашата државност, слободарскиот дух и непоколебливата верба во сопствената иднина. На овој голем празник со длабока почит им оддаваме признание на сите што се бореа за слободна Македонија, како и на историското Прво заседание на АСНОМ, со кое беа поставени темелите на современата македонска државност. Илинден не е само спомен, тоа е трајна обврска да ја чуваме државата, да го негуваме единството и да работиме за општото добро. Секоја генерација има своја задача, да ги продолжи идеалите на слободата, правдата и достоинството, со одговорност, чесност и посветеност, истакнува Минчев во честитката.
Министерот нагласува дека силна држава се гради со силни институции и со луѓе кои совесно ѝ служат, додавајќи дека Министерството за јавна администрација останува посветено на создавање професионална, ефикасна и транспарентна јавна администрација, која ќе биде вистински сервис на граѓаните и ќе го штити јавниот интерес.
-Нека Илинден не обедини околу она што е најважно, љубовта кон татковината, почитта кон нашата историја и одговорноста кон иднината. Да продолжиме заедно да градиме држава во која ќе владеат правдата, знаењето, солидарноста и еднаквите можности за сите. Нека е честит 2 Август – Илинден, Денот на Републиката, порачува министерот за јавна администрација Горан Минчев.
