По повод 2 Август – Денот на Републиката, Државниот архив претстави избор на архивски документи и фотографии од своите фондови и збирки, посветени на историското значење на Првото заседание на АСНОМ и темелите на современата македонска државност.
-На 2 август 1944 година, со Првото заседание на АСНОМ во манастирот „Св. Прохор Пчињски“, беа поставени темелите на современата македонска држава. Со донесените одлуки беше потврдена државотворната идеја на македонскиот народ и беа утврдени основите на слободна, рамноправна и демократска Македонија, истакнуваат од Државниот архив.
Меѓу најзначајните одлуки од тоа историско заседание се прогласувањето на македонскиот јазик за службен јазик, како и усвојувањето на Декларацијата за основните права на граѓаните на Демократска Македонија, со која беа загарантирани еднаквоста и основните слободи на граѓаните.
Преку изложените архивски материјали, Државниот архив им овозможува на граѓаните да се запознаат со автентични документи и фотографии што сведочат за историските настани и одлуки со кои беа поставени темелите на македонската државност.
Од институцијата нагласуваат дека изложбата претставува потсетник за значењето на АСНОМ и за трајните вредности врз кои се темели нашата државност.
