Денешниот ден започна со 11 активни пожари, со кои од вчера се борат силите на противпожарната служба, рече министерот за климатска криза и цивилна заштита на Грција Евангелос Турнас, посочувајќи дека „големиот број пожари, во комбинација со екстремните временски услови, го доведоа механизмот на границата на своите можности“.
-Многу силните, дури и бурни ветрови и понатаму создаваат исклучително тешки услови со резултат во многу случаи воздушните средства или да не можат да полнат вода, или да не можат да исфрлаат вода поради екстремните турбуленции, и покрај континуираните напори на екипажите, посочи Турнас.
Паралелно упати апел до сите граѓани да избегнуваат какви било дејствија што можат да предизвикаат пожар, но и да ги следат упатствата и на надлежните и во пораките што се испраќаат преку системот 112.
Најголемиот пожар, што сè уште е вон контрола е во централна Грција е во областа Виотија во близина на приморското место Порто Гермено, избувна вчера наутро, а поради силниот ветер брзо се прошири и продолжува да се шири.
Во конкретната област активни се неколку жаришта, гори шума во близина на населени места, а веќе се регистрирани штети и целосно изгорени куќи.
Пораки од бројот 112 за евакуација беа испратени до жителите и оние кои се наоѓаат во низа населени места во близина на пожарот, како во текот на ноќта, така и во текот на денешниот ден.
Од грчката полиција информираа дека поради пожарот во Порто Гермено, досега превентивно биле евакуирани над 1.150 граѓани од пет населени места, како и 150 возила со 500 патници, но и биле спасени осум лица кои биле заглавени, а итна помош им била укажана на 17 лица.
Во текот на вчерашниот ден по морски пат беа евакуирани 254 лица.
Противпожарните сили дополнително беа зајакнати и интервенираат 420 пожарникари (утрово беа 325), со 20 пешадиски тима и 120 возила, волонтери и цистерни од општината.
За гаснење од воздух на располагање се 18 авиони и 11 хеликоптери, но нивната интервенција зависи временските услови, односно од јачината на ветрот, а пилотите вложуваат напори за полнење вода од морето за да помогнат во гаснењето.
