Со доделување на награди за најдобрите културно уметнички друштва, фолклорни групи и поединци, синоќа во Битола заврши 56 издание на фестивалот на народни песни и игри „Илинденски денови“.
Со одлука на стручно жири за најуспешна група која презентира изворна-традиционална музика и игра-обред, прогласена е женската група „Теута“ од Тетово, за најуспешна група која презентира староградска музика и игра прогласен е ансамблот за народни песни и ора „Вања Лазарова“ од Скопје, за најуспешна интерпретација на новопоставени фоклорни содржини инспирирани од изворните прогласен е ансамблот „Орце Николов“ од Скопје, за најуспешна вокална изведба е прогласена изведбата на Марија Добриновска од КУД „Јане Сандански“-Неготино, а за ансамбл со најдобра, најкомплетна, изворна народна носија годинава е прогласен фолклорниот ансамбл „Цветови“ од село Дедино.
На синоќешното свечено затворање се обратија градоначалникот Тони Коњановски, кој се заблагодари на организаторите, учесници и гостите на фестивалот кои, како што рече придонесоа Битола да живее денови кои не се мерат со време, туку со вистинска емоција со пулсот на еден народ кој културата и традицијата ги поставил на пиедесталот на највисоките вредности, додека пак директорот на НУ Центар за култура Битола, Сашо Илковски нагласи дека над 1.300 учесници ја исполнија Битола со живот, енергија и убавина, но бројките сами по себе не го прават фестивалот, рече Илковски, туку фестивалот го прават луѓето.
Според востановената традиција, на последната фестивалска вечер настапија ансамблите од странство, односно од Венецуела, Грузија, Грција, Унгарија, Холандија, Словачка и Порторико.
