Започнаа градежните подготовки за изведба на повеќе градежни зафати за реконструкција на внатрешноста на Спортската сала „Гемиџии“ во Велес. Ќе се реконструираат соблекувалните со тоалетите за спортистите, а потоа и тоалетите за публиката, а во втората фаза ќе се направат и тоалети за лицата со посебни потреби. Што е посебно важно целосно ќе се реконструира водоводната и канализациската мрежа и целосно ќе се смени дотраената електрична инсталацијата во објектот, информира Злате Стојковски директор на ЈП „ Парк спорт“ во чиј состав е и спортската сала.
Од Општина Велес информираат дека нaјголем дел од средствата се обезбедени од Владата преку унгарскиот кредит и со посредство на Министерството за спорт, а во дел ќе се финансира и од буџетот на Општина Велес.
Изведувач на работите е велешката Градежна фирма „Изгрев“ и се планира реконструкцијата да заврши за три до четири месеци, во зависнот од многу околности, најавија од Општина Велес.
Инаку спортската сала „Гемиџии“ првично Спортска сала „25 Мај“ беше една од велелепните спортски објекти не само во Македонија, туку и во поранешна Југославија изградена во 1981, а свечено пуштена во употреба во 1982 година. Собира околу 3500 гледачи. Освен кошаркарски, ракометни и одбојкарски натпревари во неа се одржуваа и футсал натпревари, како и многу културни и хуманитарни настани и концерти.
Неодамна во салата целосно беа реконструирани и дигитализирани семафорите за следење на натпреварите.
