Во Општина Чаир во тек е реализација на инфраструктурни проекти, при што паралелно се работи на изградба и реконструкција на подземната и надземната инфраструктура во повеќе населби. Како што соопштуваат од локалната самоуправа, градоначалникот Изет Меџити порачал дека инвестициите се одвиваат со засилено темпо и се насочени кон подобрување на условите за живот и модернизација на општината.
– На секоја улица, во секое маало, низ целиот Чаир се работи. Инвестираме во подземната инфраструктура, градиме и реконструираме улици, тротоари и јавни површини, со динамика што граѓаните секојдневно можат да ја видат – истакна Меџити.
Тој нагласи дека инвестициите што се реализираат се дел од континуираната заложба за подобрување на условите за живот на граѓаните и за модернизација на општинската инфраструктура.
– Ова е нашиот начин на владеење: работа, инвестиции и резултати. За нашите градови, за нашите граѓани и за нашата држава. Продолжуваме – изјави Меџити.
Од Општината дополнуваат дека остануваат посветени на реализација на развојни проекти во секое маало, со цел создавање модерна, функционална и достоинствена инфраструктура за сите граѓани.
