Крушево е подготвено за Празникот и за одбележувањето на 123 годишнината од Илинденското востание и Крушевската Република. Бројни настани опфаќа традиционалната и значајна манифестација „10 Дена Крушевска Република“ која од лани е веќе национална установа.
Утревечер од 18,30 часот во центарот на Крушево, пред столбот на Крушевската Република и пред црквата „Свети Никола“, Крушево официјално ќе ги пречека Илинденските коњаници. Се очекуваат околу 140 коњаници од повеќе краишта на Македонија.
-Свеченото пречекување на коњаницата секоја година, а и годинава е на 31 јули, утревечер во Градскиот парк во Крушево, односно пред Столбот на Крушевската Република. Оваа година ќе имаме од 120 до 140 коњаници. Веќе сме во координација и остваривме и состаноци околу делувањето во Манифестацијата, за нивниот пат и за нивните рути, како и секоја година. Мислам дека треба да се даде поголемо внимание на овој чин, бидејќи останува како автентично доживување за гостите, вели Захарија Ангелеска, од НУ Дом на културата „10 Дена Крушевска Република“- Крушево.
Традиционалното отворање на манифестацијата е на 1 август, на Гумење. Почит за илинденците, потсетување на големите историски настани како зачетоци на македонската современа држава. Од први до 10 август се бројни настани во рамките на Манифестација.
-Главен покровител на настанот е Општина Крушево. Го зачувуваме стариот, традиционалниот начин на празнување, односно со македонска песна, а го имаме и забавниот дел кој годинава ќе биде сместен во Градскиот парк. Значи, главното збиднување ќе биде на Гумење, а забавниот дел ќе биде во Градскиот парк, рече Ангелеска.
Според програмата, годинава модератор на Манифестацијата на Гумење ќе биде Рубенс Муратовски. Химната ќе ја интонира баритонот Иван Наумовски, на присутните на Гумење ќе им се обрати градоначалникот на Крушево Нико Чоневски, а актерот Игор Трпчески ќе го прочита Крушевскиот манифест. На Гумење ќе се огласи Црешовото топче, а ќе има и огномет, како и настап на Ансамблот „Никола Јонков Вапцаров“ од Горно Лисиче од Скопје. Од 21,15 часот ќе настапи групата „Чалгии мерак“ од Скопје.
Во Градскиот парк во Крушево вечерта од 22,45 часот ќе настапи групата „Супер хикс“.
Централното чествување на Празникотќе биде на 2 Август- Илинден на Мечкин Камен.
Манифестацијата „10 Дена Крушевска Република“ ќе понуди богата програма со настани, работилници и на 5 август научна трибина за придобивките на Илинден, Востанието и Крушевската Република.
-Задоволство е што се вклучени и младите кои сакаат да учествуваат во настаните зашто така се пренесуваат традициите и историските придобивки, вели Ангелеска од Н У „Дом на културата “ -10 Дена Крушевска Република“- Крушево.
