Министерот за социјална политика, демографија и млади, Ѓоко Велковски, денеска остварил средба со евроамбасадорот Михалис Рокас, на која била потврдена заедничката посветеност за продолжување на успешната соработка и реализација на проекти со поддршка на Европската Унија, кои носат конкретни придобивки за граѓаните.
Во фокусот на разговорите, како што соопшти Министерството, биле тековните и идните активности во областите што ги покрива Министерството за социјална политика, демографија и млади, како и визијата, приоритетите и можностите за нивна понатамошна реализација со поддршка од Европската Унија.
-Посебен акцент на средбата беше ставен на демографските предизвици со кои се соочуваат Европа и Северна Македонија, како и на владините политики насочени кон подобрување на демографските трендови. Двете страни разговараа и за политиките за младите, нивното мотивирање да ја градат својата иднина во државата, како и за нивното активно вклучување во креирањето на јавните политики, стои во соопштението на Министерството.
Оттаму додаваат дека било разговарано и за унапредувањето на родовата еднаквост, при што беше истакната важноста од креирање и спроведување политики што обезбедуваат еднакви можности, еднаков пристап до права и услуги и активно учество на жените и мажите во сите сфери на општеството.
-Соговорниците се согласија дека успехот на секој проект и политика се мери преку нивното ефективно спроведување и нивното влијание врз граѓаните, односно доколку мерките навремено и ефикасно ги достигнат оние на кои им се наменети. На средбата беше разговарано и за подготовката на Законот за социјално домување и Законот за социјално претприемништво, кои се очекува наскоро да бидат донесени и да придонесат за понатамошно унапредување на системот на социјална заштита и социјалната инклузија. наведуваат од Министерството.
Амбасадорот Рокас уште еднаш ја потврдил силната поддршка на Европската Унија за евроинтегративниот процес на Република Северна Македонија и ја истакнал подготвеноста за продолжување на партнерството во спроведувањето на реформите.
На крајот од средбата, министерот Велковски и амбасадорот Рокас изразиле задоволство од конструктивниот дијалог и ја потврдиле заедничката определба за натамошно продлабочување на соработката, со цел успешна реализација на реформските процеси и политики што ќе придонесат за подобар квалитет на живот на граѓаните и за забрзување на европската интеграција на државата.
