Со доделување награди и признанија за учесниците, заврши конкурсот „Најстаро издание на лектира“ во организација на ЈЛБ „Илинден“, кој и оваа година ја потврди вредноста на старите книги како чувари на спомени, историја и културно наследство.
На конкурсот учествуваа вкупно 13 љубители на книгата, меѓу кои и четири деца, кои преку своите примероци покажаа дека лектирите не се само дел од образованието, туку и значајно сведоштво за времето во кое настанале.
Библиотеката на сите учесници им додели подарок книга, како знак на благодарност за нивниот ентузијазам, љубов кон читањето и заложбата за зачувување на книжевното наследство.
Стручното жири ги награди и трите најстари изданија. Првото место го освои Анита Петровска со лектира од 1953 година, второто место му припадна на Сашко Јовановски со издание од 1954 година, додека третото место го освои Сања Даневска со лектира од 1963 година.
Од библиотеката истакнаа дека ваквите настани имаат особено значење за поттикнување на љубовта кон книгата, како и за подигнување на свеста за важноста на зачувување на старите изданија.
– Кога ја чуваме книгата, ја чуваме и нашата култура, историја и идентитет, посочуваат од ЈЛБ „Илинден“.
Организаторите изразија надеж дека конкурсот ќе прерасне во традиционален настан, кој секоја година ќе обединува нови генерации читатели и ќе потсетува на непроценливата вредност на старите лектири како мост меѓу минатото и иднината.