Македонските дебатери, претставници на Младинскиот образовен форум (МОФ), постигнаа историски успех на Prague Debate Spring 2026, освојувајќи го првото место во почетничката категорија и остварувајќи уште еден врвен резултат во отворената конкуренција на еден од најпрестижните меѓународни турнири во компетитивна дебата.
Турнирот се одржа од 10 до 13 јули во Прага, како дел од IDEA Youth Forum, меѓународен младински форум организиран од International Debate Education Association (IDEA) – европската мрежа која ги обединува дебатните организации и клубови од Европа и пошироко. Настанот, кој траеше од 6 до 13 јули, собра околу 300 млади дебатери од речиси сите европски земји, како и од САД, Канада, Кина, Јапонија, Тајван, Јужна Африка и други држави.
Младинскиот образовен форум ја претставуваше државата со два тима.
Тимот Macedonia Red, составен од Јана Господинова, Ана Василева, Стефан Николовски и Матео Зафировски, оствари извонреден успех, пласирајќи се како највисоко рангиран почетнички тим по прелиминарните рунди. Во финалето тие ја потврдија својата доминација и го освоија првото место во почетничката категорија.
Macedonia Yellow, во состав Спасе Панев, Искра Ѓероска, Ема Велјановска и Елена Николова, обезбеди пласман во отвореното осминафинале, каде што беше елиминиран по навистина компетитивна и неизвесна дебата од тимот на Тајван. Спасе Панев, Искра Ѓероска и Ема Велјановска претходно беа дел од македонскиот национален тим во компетитивна дебата.
Во текот на шесте прелиминарни рунди, македонските дебатери дебатираа на импромпту теми против екипи од различни делови на светот, покажувајќи исклучителни аналитички способности, јавно говорење и аргументација.
Дополнително признание доби Искра Ѓероска, која беше рангирана како 9-ти најдобар говорник во категоријата English as a Foreign Language (EFL), што претставува уште една потврда за квалитетот на македонските дебатери на меѓународната сцена.
Ова е продолжение на успешната низа на Младинскиот образовен форум на Prague Debate Spring. Од 2023 година, организацијата секоја година испраќа свои претставници на турнирот, при што македонските тимови редовно обезбедуваат пласман меѓу 16-те најдобри тимови во конкуренција од повеќе од 60 тимови од држави од целиот свет. Годинава, за првпат, македонски тим го освои шампионскиот трофеј во почетничката категорија.
За време на IDEA Youth Forum, дебатерите имаа можност не само да се натпреваруваат, туку и да учествуваат на работилници, предавања и активности за размена на искуства со
млади од различни култури, дополнително развивајќи ги своите лидерски, комуникациски и интеркултурни вештини.
Тимовите беа придружувани и поддржувани од Дора Смилевска, Јован Василевски и Меланија Петровска, кои на турнирот учествуваа како меѓународни судии и воедно се пласираа како едни од најдобрите судии на турнирот, судејќи и во елиминационите дебати. Постигнатиот успех е резултат на долгогодишната работа на дебатната програма на Младинскиот образовен форум, како и на посветеноста на тренерите и дебатерите кои со години вложуваат труд во развојот на критичкото размислување, аргументацијата и јавното говорење.
Во текот на последните два месеци, успеавме да победиме и регионален турнир кој се одржа во Тирана и истиот го победивме во тим составен од Спасе Панев, Ема Велјановска и Стефан Николовски, а во мај победивме и интернационален турнир во Парма, Италија во тим составен од Спасе Панев, Ема Велјановска, Јана Господинова и Михаела Атов и Ема Велјановска се пласираше како прв најдобар говорник на истиот турнир.
Младинскиот образовен форум е единствената организација во Македонија која спроведува национална програма за дебата и критичко размислување, преку која секоја година стотици средношколци и студенти бесплатно посетуваат неделни обуки за критичко размислување, анализа, јавно говорење и компетитивна дебата. Учесниците имаат можност да се натпреваруваат на национални и меѓународни турнири и да ја претставуваат државата на најзначајните дебатни натпревари во светот.
Новиот повик за приклучување кон дебатната програма за средношколци и студенти ќе биде објавен во текот на септември 2026 година, а сите информации ќе бидат достапни на вебсајтот и социјалните мрежи на младински образовен форум.
