Претседателот на Собранието, Африм Гаши, денеска имал проштална средба со амбасадорот на Чешката Република во земјата, Јарослав Лудва, чиј мандат набргу завршува.
Гаши му се заблагодарил на амбасадорот Лудва за посветеноста и ангажманот за унапредување на односите меѓу двете држави, за продлабочување на меѓусебното пријателство и соработка, како и за постојаната поддршка за евроинтеграциите, изразувајќи уверување дека ќе продолжи во наредниот период.
– Амбасадорот Лудва ја потенцира одличната соработка што ја имал со Собранието и истакна дека Чешката Република ќе остане силен поддржувач на Македониjа и пријателска земја на која можеме да сметаме. Тој го поздрави реформскиот процес што го реализира нашата држава во согласност со планот на раст и нагласи дека Македонија е најдобра во регионот во овој поглед. Претседателот Гаши му посака на амбасадорот Лудва многу здравје и успех во натамошните професионални предизвици – информира собраниската прес-служба.
